Heiðurslønir til eldsálir innan barna- og ungdómsarbeiði

Á hvørjum ári letur FUR heiðurslønir til eldsálir innan sjálvboðið barna- og ungdómsarbeiði.

Øll kunna innstilla verkætlanir og einstaklingar til heiðursløn m.a. eru tað ikki bert nevndirnar í feløgunum, sum kunna innstilla, men eisini einstakir limir, eins og foreldur v.m.

Innstillingarblað at fylla út og senda til fur@fur.fo innan 15. februar á hvørjum ári er tøkt her.

Starvsstjórnin í FUR letur árliga heiðursløn til verkætlanir og einstaklingar. Heiðurin verður latin á landsfundi FUR’s. Latnar vera upp til tríggjar heiðurslønir. Heiðursløn FURs er eitt heiðursbræv og ein heiðursløn kr. 5.000 – 10.000.

Starvsstjórnin kann eisini taka avgerð um at lata heiðursløn til verkætlanir og einstaklingar.

Endamál

Endamál FURs við at lata heiðurslønina er, at:

  • geva eldsálum innan barna- og ungdómsfelagarbeiði viðurkenning
  • geva virknum barna- og ungdómsfeløgum viðurkenning fyri sítt arbeiði
  • vekja áhugan millum børn og ung fyri sjálvbodnu barna- og ungdómsfelagsskapunum
  • vísa á samfelagsliga týdningin av arbeiðinum hjá sjálvbodnum barna- og ungdómfelagsskapum.

Nógvir møguleikar

Møguleiki er fyri at fáa heiðursløn FURs fyri nógv ymiskt. t.d.:

  1. fólk, sum ganga undan og brenna fyri barna- og ungdómsarbeiði – sonevndar eldsálir.
  2. eitt serligt tiltak fyri børn og/ella ung á staðnum
  3. tiltøk sum børn ella ung skipað fyri, sum t.d. hjálpartiltak fyri eldri. Tiltøk, sum varpa ljós á t.d. happing, umhvørvi e.a.
  4. ein serliga krevjandi verkætlan
  5. ein slóðbrótandi verkætlan
  6. eitt serliga væleydnað kunningar og/ella upplýsingar tiltak

ja, møguleikarnir eru nógvir.

Heiðurslønir latnar á Landsfundi FURs 2019

Øll hava rætt til góða barnaár
Verkætlanin Øll hava rætt til góða barnaár hjá Blákross Ungdómi fekk heiðursløn fyri, at bjóða børnum og ungum, ið hava foreldur við rúsdrekka-  ella rúsevnistrupulleikum samrøður í bólkum. Fólk flest í samfelagnum eru bangin fyri, at seta orð á trupulleikan, og tí kunna hesi børn og ungu føla, at tey ongastaðni hava at venda sær.

Verkætlanin er eitt trygt stað, sum ger stóran mun í lívinum hjá hesum børnum, ungum og familjum teirra.

Annika Eidesgaard, skrivari hjá CISV
Annika Eidesgaard fekk heiðursløn fyri, at hava gjørt eitt megnar arbeiði at fyriskipa atljóða CISV legur, bæði tá legur hava verið í Føroyum og eisini, tá Føroyar senda børn og ung aðrastaðni. Børn og ung hava fingið upplivingar fyri lívið og hava knýtt vinarsambond kring allan heimin.

Martin Kúrberg, leiðari av viðgerðarheimi til ung
Martin Kúrberg er leiðari av viðgerðarheiminum Frælsið á Eiði, sum er eitt avvenjingartilboð fyri ungdóm í aldrinum 18-24 ár, sum eru bundin av rúsdrekka og rúsevnum. Martin Kúrberg fekk heiðursløn fyri at vera ein brennandi eldsál at hjálpa ungum, sum eru bundin av rúsevnum. Martin er ein fyrimynd fyri øll ung um, at tað er ein vón fyri ung við rúsevnistrupulleikum og at vit hava eina samfelagsliga skyldu, til at hjálpa øðrum.

Heiðurslønir latnar á Landsfundi FURs 2018

Títlingaleiðararnar hjá Havnar KFUK-skótum
Títlingaleiðararnir fyri Havnar KFUK-skótar fingu heiðursløn fyri teirra sera góða arbeiði at geva gentunum góðar og mennandi avbjóðingar, ið ger, at tær vaksa í trúnni á seg sjálvar. Til hetta arbeiði hava tær m.a. arbeitt við ”Free being me” verkætlanini, ið serliga er gjørd, fyri at læra at góðtaka seg sjálvan, sum ein er – at vit øll eru góð nokk sum vit eru.
Eitt foreldur hevur skrivað soleiðis til ein av skótaleiðarunum: ”Tit eru óførar, dugnaligar, hjartaligar, ótroyttiligar! Vit eru heppin at hava so góðar kvinnur at leggja okkara børnum so gott í beinið. So ein hjartans tøkk kemur frá okkum. Tit eru gull verdar!”

Bogi F. Sigurstein, leiðari hjá Skótaliði KFUMs í Tórshavn
Bogi F. Sigurstein fekk heiðursløn fyri sítt trúfasta og miðvísa arbeiði at tryggja øllum í skótaliðnum menning og lívsútbúgving og at leggja lunnar undir øllum virkseminum hjá Skótaliði KFUM’s. Bogi F. Sigurstein arbeiðir miðvíst fyri at gera umstøðurnar hjá úlvum, skótum og leiðarum enn betri enn tær eru í dag. Ímillum avrik hansara kann nevnast Bogastova í Havnardali.

Høgni Jensen, leiðari hjá Føroya Skótasamband
Høgni Jensen fekk heiðursløn fyri sítt stóra arbeiði innan skótarørsluna og fyri at flyta føroysku skótarørsluna framá. Høgni Jensen hevur verið leiðari í Skótafylki Sigmunds Brestisson í 22 ár og hevur verið sera virkin í landsarbeiði bæði hjá Føroya Skótasambandi, Føroya Skótaráð og innan Skótahjálpina.

Sum leiðari hevur Høgni Jensen fingið ungfólk at taka ábyrgd og leiðslu og hevur staðið á odda fyri  uttanlandslegum. Fleiri av skótunum hjá Høgna Jensen (bæði fyrrverandi og núverandi) eru í dag at síggja í fremstu røð í samfelagnum.

Heiðurslønir latnar á Landsfundi FURs 2017

Hjørdis Johansen, Dramaverkstaðið
Hjørdis Johansen, Dramaverkstaðið fyri avrik sum íbirtari fyri børn og ung leiklistini í Føroyum at frama ígjøgnum nógv ár.

Jóna Venned, KFUM skótarnir í Føroyum
Jóna Venned, KFUM skótarnir í Føroyum fyri fyrimyndarliga og týdningarmikla arbeiði sum Jóna Venned ger fyri skótaarbeiði í Føroyum.

Blákross Ungdóm fyri verkætlanina Liv Lívið
Blákross Ungdóm fyri verkætlanina Liv Lívið, sum eitt stórt og vælgjørt tiltak, ið nógv fólk hava tikið lut í og fingið gleða av og at verkætlanin setir fokus á evni, sum eru týdningarmikil og alment gagnlig.